പുത്തൻചന്ത സെൻ്റ് മേരീസ് പള്ളിയുടെ തുടർന്നുള്ള ചരിത്രവും വളർച്ചയും, യശ്ശ:ശരീരനായ ചിറത്തലാട്ട് സി.വി ജോർജ്ജ് കോർ എപ്പിസ്കോയുടെ ജീവചരിത്രവുമായി അഭേദ്യമായി ബന്ധപ്പെട്ടു കിടക്കുന്നു. 1913 ൽ ജനിച്ച അച്ചൻ വള്ളിക്കാട്ട് ദയാറായിൽ നിന്ന് വി. മാമോദീസാ സ്വീകരിച്ചു. 12-ാം ത്തെ വയസ്സിൽ വള്ളിക്കാട്ട് ദയറായിൽ കബറടങ്ങിയ മലങ്കര സഭയുടെ രണ്ടാമത്തെ കാതോലിക്ക പരിശുദ്ധ ബസ്സേലിയോസ് ഗീവറുഗീസ് പ്രഥമൻ ബാവായുടെ അടുക്കൽ വൈദിക പഠനത്തിന് തുടക്കം കുറിച്ചത് അച്ചൻ്റെ ജീവിതത്തിലെ വഴിത്തിരിവായിരുന്നു. സ്കൂൾ ഫൈനൽ കഴിഞ്ഞ് പ. ബാവാതിരുമേനിയിൽ നിന്നും പട്ടം സ്വീകരിക്കുവാൻ ആഗ്രഹിച്ചിരുന്നെങ്കിലും ബാവാ തിരുമേനി രോഗബാധിതനായി പെട്ടെന്ന് കാലം ചെയതതു മൂലം അതിന് കഴിഞ്ഞില്ല. അതുകൊണ്ട് തുടർ പഠനത്തിന് അച്ചൻ പോകുകയും BALT ബിരുദം നേടുകയും ചെയതു. പിന്നീട് ചിറത്തിലാട്ട് കുടുംബവുമായി ബന്ധമുണ്ടായിരുന്ന കൂട്ടുങ്കൽ ഗീവറുഗ്ഗീസ് റമ്പാച്ചൻ്റെ നിർദ്ദേശമനുസരിച്ച് തൃക്കോതമംഗലം ദയറായിൽ ചേരുകയും തുടർന്ന് മിഖായേൽ മാർ ദീവന്നാസിയോസ് തിരുമേനിയിൽ നിന്ന് 1943 ൽ വൈദിക പട്ടം സ്വീകരിച്ച് മാതൃ ഇടവകയിൽ പ്രഥമ ബലി അർപ്പിച്ചു. പഴയ ദേവാലയം പുതുക്കി പണിയണമെന്ന് ഇടവകാംഗങ്ങളുടെ ആഗ്രഹപ്രകാരം 1953 ജനുവരി 7-ാം തീയതി പുതിയ ദേവാലയത്തിൻ്റെ ശിലാസ്ഥാപന കർമ്മം ഞാറക്കുളത്ത് ബഹു. യാക്കോബ് റമ്പാച്ചൻ നിർവ്വഹിച്ചു. 1957 ൽ പള്ളിയുടെ രജതജൂബിലി പൗലോസ് മാർ പീലക്സീനോസ് തിരുമേനിയുടെ പ്രധാന നേതൃത്വത്തിൽ ആഘോഷിക്കപ്പെടുകയുണ്ടായി. 1943 മുതൽ 1958 വരെ പാത്രിയർക്കീസ് പക്ഷത്തോടൊപ്പം നിന്ന അച്ചനും ഇടവകയും 1958 ലെ സുപ്രീം കോടതി വിധിയെ തുടർന്ന് യോജിച്ച സഭയുടെ ഭാഗമായി. 1966 ജനുവരി 6-ാം തീയതി നടന്ന പുതുക്കിപ്പണിത ദേവാലയത്തിൻ്റെ കൂദാശ കർമ്മം ഇടവകയെ സംബന്ധിച്ചിടത്തോളം അവിസ്മരണീയമായ അനുഭവമായി. പരിശുദ്ധ കാതോലിക്ക മോറാൻ മാർ ബസ്സേലിയോസ് ഔഗേൻ പ്രഥമൻ ബാവ, ഇടവക മെത്രാപ്പോലീത്ത മാത്യൂസ് മാർ ഈവാനിയോസ് തിരുമേനി, മാത്യൂസ് മാർ അത്താനാസിയോസ് തിരുമേനി (പിൽകാലത്ത് പ. ബസ്സേലിയസ് മാർത്തോമ്മ മാത്യൂസ് പ്രഥമൻ കാതോലിക്കാബാവ) ക്നാനായ ഭദ്രാസനത്തിൻ്റെ ഏബ്രാഹാം മാർ ക്ലിമ്മീസ് തിരുമേനി എന്നിവരുടെ കാർമ്മികത്വത്തിലാണ് പുതിയ ദേവാലയത്തിൻ്റെ കൂദാശ കർമ്മം നടന്നത്. എന്നാൽ 1970 ആയപ്പോൾ സഭയിൽ വീണ്ടും ഭിന്നിപ്പും കക്ഷി വഴക്കുകളും ആരംഭിച്ചു. ഒപ്പം നിന്ന പല വൈദീകരും അൽമായ സുഹൃത്തുകളും യാക്കോബയെ പക്ഷത്തേക്ക് മാറിയെങ്കിലും വന്ദ്യനായ സി.വി ജോർജ്ജ് കോർ എപ്പിസ്കോപ്പാ 1958 ൽ എടുത്ത തീരുമാനം ശരിയെന്ന ഉറച്ച ബോധ്യത്തോടെ ഓർത്തഡോക്സ് പക്ഷത്ത് സത്യവിശ്വാസ പാതയിൽ പാറപോലെ ഉറച്ചു നിന്നു. ഇടവകക്കാരിൽ പലരും പ്രത്യേകിച്ച് സ്വന്തം കുടുംബത്തിൽപ്പെട്ടവർ പോലും മറുവിഭാഗത്തോട് താല്പര്യം പുലർത്തിയെങ്കിലും അച്ചൻ്റെ ഉറച്ച നിലപാടുകൾ ഇടവകയിലെ ബഹു ഭൂരിപക്ഷത്തെയും അച്ചൻ എടുത്തിരുന്ന നിലപാടിൽ ഉറപ്പിച്ച് നിർത്താൻ കഴിഞ്ഞു.

2006 ൽ ഇടവകയിൽ നിന്ന് പിൻമുറക്കാരനായി ഒരു വൈദീകൻ കൂടിയുണ്ടായി. ചിറത്തലാട്ട് സി. ജോൺ കോർ എപ്പിസ്കോപ്പായുടെ പുത്രൻ ലിജേഷ് ചിറത്തലാട്ട് ഭാഗ്യസ്മരണാർഹനായ ഗീവറുഗീസ് മാർ ഈവാനിയോസ് തിരുമേനി ശെമ്മാശു പട്ടവും വൈദികപട്ടവും നൽകി. ഹൈസ്കൂൾ വിദ്യാഭ്യാസം പൂർത്തീകരിച്ച കാലം (1994) മുതൽ ഈവാനിയോസ് തിരുമേനിയുടെ ശിഷ്യത്വം സ്വീകരിച്ച് ഞാലിയാകുഴി ദയറായുടെ ഭാഗമായിരുന്നു ലിജേഷ്. ഗുരു ശ്രേഷ്ഠനായ ഈവാനിയോസ് തിരുമേനിയെ ശുശ്രൂഷിക്കാനുള്ള ഭാഗ്യവും. ഞാലിയാകുഴി ദയറായെ പ്രാർത്ഥനാ സങ്കേതമായി തെരെഞ്ഞെടുത്ത പ.പൗലോസ് ദ്വിതീയൻ കാതോലിക്ക ബാവായുടെ വാത്സല്യവും സഖറിയ നൈനാനച്ചന് ലഭിച്ചു. ദയറായുടെ വിവിധ ചുമതലകളോടൊപ്പം മലങ്കര സഭാ മാസികയുടെ ചീഫ് എഡിറ്റർ, അഖില മലങ്കര വൈദികസംഘം ജോയിന്റ് സെക്രട്ടറി എന്നീ നിലകളിലും പ്രവർത്തിച്ചു. ഏതാണ്ട് പതിനഞ്ചോളം പുസ്തകങ്ങളും രചിച്ചു. 2022 ഫെബ്രുവരി 25-ാം തീയതി നടന്ന മലങ്കര സുറിയാനി ക്രിസ്ത്യാനി അസ്സോസിയേഷൻ മെത്രാപ്പോലീത്താസ്ഥാനത്തേയ്ക്ക് തെരെഞ്ഞെടുത്ത ഏഴു പേരിൽ ഏറ്റവും പ്രായം കുറഞ്ഞ വൈദീകനായി. 2022 ജൂലൈ 2ന് പരുമല സെമിനാരിയിൽ വെച്ച് പ. ബസ്സേലിയോസ്സ് മാർത്തോമ്മ മാത്യൂസ് തൃതീയൻ കാതോലിക്കാബാവാ റമ്പാനായി വാഴിച്ചു. തുടർന്ന് ജൂലൈ 28 ന് ചരിത്ര പ്രസദ്ധമായ പഴഞ്ഞി സെന്റ് മേരീസ് പള്ളിയിൽ വെച്ച് ആറു പേരൊടൊപ്പം മെത്രാപ്പോലീത്തയായി വാഴിക്കപ്പെട്ടു. നാട് ഏറെ സന്തോഷിച്ച ആ ചടങ്ങുകളിലെല്ലാം ഇടവകാംഗങ്ങൾ പ്രത്യേകം ക്രമീകരണങ്ങളോടെ പങ്കെടുത്തു. പരിശുദ്ധ ബാവാ തിരുമേനിയുടെ കല്പനപ്രകാരം 2022 നവംബർ 3 മുതൽ ഇടുക്കി ഭദ്രാസനത്തിൻ്റെ മെത്രാപ്പോലീത്തയായി സേവേറിയോസ് തിരുമേനി ചുമതലയേറ്റു പ്രവർത്തിച്ചു വരുന്നു. 2022 ജൂലൈ 31 ന് അഭിവന്ദ്യ സഖറിയ മാർ സേവേറിയോസ് മെത്രാപ്പോലീത്തായ്ക്ക് ഇടവക നൽകിയ അനുമോദനം മറ്റൊരു ചരിത്ര നിമിഷമായി മാറി.